കാണാതെ പോയത്

കടപ്പാടറുത്ത്,
കഥയിലൊന്ന് പകുതിയിലും നിര്‍ത്തി
കര്‍ക്കിടക പ്രളയത്തിലേക്ക്
കുളിര്‍ കൂടാതെ കിതച്ച് നടക്കുമ്പോള്‍
പീളമുറുകി അടഞ്ഞുചേര്‍ന്ന ജനാലയുടെ
നരവീണുപൊട്ടിയ അഴിപ്പാടുകളില്‍
ഉറുമ്പുകളുടെ ശവഘോഷയാത്ര!

ചാറ്റമഴ കുടിച്ച് ആര്‍ത്തിതീര്‍ന്ന
ചെണ്ടുമല്ലിയിലെ ബാക്കിയായ നനവ്
പ്രണയം തോട് പൊട്ടിച്ച് ഉന്മത്തമാക്കിയ
പുറമ്പോക്കുകളിലെവിടെയൊ വെച്ച്
നിന്നിലേക്ക് കുലുക്കി പൊഴിച്ചതും
പെട്ടെന്നൊരാളലില്‍ ഇറുകെ പുണര്‍ന്ന്
ചൊടിയുടെ ചൂടാലുരുകും മുമ്പ് നുണഞ്ഞിറക്കിയതും
കാറ്റ് ചെവിതിരുമ്മി ഓര്‍മ്മപ്പെടുത്തുന്നു
കറവീണ ചുണ്ടുകളില്‍ തട്ടി
ഒലിച്ചിറങ്ങുന്ന ജലപ്പാടുകളില്‍
കുതിര്‍ന്നു പടരുന്ന സിന്ദൂരത്തിന്റെ
മദിപ്പിക്കുന്ന ഗന്ധം .

കാലന്‍കോഴി നീട്ടിനീട്ടി കൂവുന്ന പാതിരാവിലും
തഴുകിതിണര്‍ത്ത വിരല്‍പ്പാടുകളില്‍ ചുണ്ടുരച്ച്
പോള കനത്ത കണ്ണുകളിലിറ്റും പ്രണയവുമായി
കാത്തിരിപ്പ് തുടരുക….
മുലക്കച്ച അഴിഞ്ഞുതിര്‍ന്ന പാതയിലൂടെ
മുഖമണച്ച് ഞാന്‍ നിന്നിലേക്ക്
ഇഴഞ്ഞിറങ്ങുന്ന മറുകാലവും തേടി!